頒布國安法後嘅香港，處處都係紅線。呢啲無處不在嘅細絲散落於香港，由纏繞到勒緊，再侵蝕……正因為紅線太幼，一般人好難察覺到佢哋嘅存在，往往要到紅線喺牆身蝕出凹痕，大家先會知道原來條線就喺嗰度。隨住紅線越嚟越多，我哋嘅城市都被勾勒出越嚟越多嘅傷痕，亦都越嚟越脆弱，對身處喺香港呢座危城嘅人嚟講，每日都好似係最後一日……

今期《學苑》以「危城」為題。新聞版分為校園新聞同社會新聞兩部分。校園新聞方面，校委會無視程序公義，架空教委會，強行解除戴耀廷副教授嘅教席；港大校政遭到校外勢力插手干預，作為港大學生，我哋有責任關注校委會嘅組成同任命。此外，武漢肺炎肆虐導致上年度及來年都係以網上教學為主，究竟網上教學成效如何？再者，港大膳食重整計劃第二階段在新學年前完成，今期亦會為同學介紹校園內嘅新餐廳。社會新聞方面，民主派於7月中曾舉行立法會初選，雖然現選舉被押後、大量民主派候選人被無理DQ，但今次初選結果依然具歷史意義，今期學苑希望以〈初選結果分析〉幫大家重溫之餘，亦同時為時代留下見證。另一方面，由5月21日公布、到6月30日正式生效，短短一個月多啲嘅時間，中共無視香港人嘅民意，強行將港區國安法以基本法附件三嘅形式加諸於港人身上，過程倉卒且橫蠻。〈國安法時間線〉記錄低短短呢個幾月，港區國安法點樣橫空出現，打壓港人自由。而喺後國安法時代，香港權力架構亦隨之有所變動，今期社會新聞就希望帶讀者一睹〈香港新秩序〉。

而專題版方面，今期《學苑》除咗推論香港未來嘅困境，亦望探討港人喺呢個最壞嘅時代應該點樣同香港一齊行落去。〈失城，然後我們〉一文抒發對香港逐漸消逝嘅不安與迷惘。〈後真相時代的新聞識讀〉帶讀者於大時代下重新審視媒體議題設定（agenda-setting）同「fact check」嘅重要性。〈後國安法時代看香港經濟〉講到香港經濟須以價值主導嘅模式重新出發，重振實業。〈看香港品牌的興衰〉則望香港人對香港品牌重拾信心，切勿妄自菲薄。而〈看不見的紅線〉一文中，學苑藉專訪資深傳媒工作者及浸大新聞系高級講師呂秉權，希望探討傳媒喺國安法實施後紅線遍佈嘅香港應該點樣自處。〈移植到港的輿論鬥爭〉探討中共輿論控制嘅手段，亦有推論中共未來會點樣逐步收窄港人嘅言論自由。〈苟延殘喘：中共能否將香港打造成新加坡〉一文對比香港同新加坡，兩個經濟結構相似但本位不同嘅地方，推演中共為勉強維持香港生命，頒下國安法，將香港推上新加坡模式的路。

再者，今期《學苑》亦望港人能以史為鑒。評論版〈波蘭——東歐劇變的第一塊骨牌〉一文簡述波蘭人推翻共產暴政的歷史，面對傀儡政權多樣且全面的打壓，波蘭人如何採取靈活的手段應對？當時波蘭人面對什麼困境？讓我們以波蘭人為師。

最後，文藝版以「末日」為題。步入2020年，無論香港抑或係全世界嘅情況都急轉直下，一時之間陰霾密布。末日之下，各地唔同嘅人抱持住形形色色嘅態度面對，採取嘅行動亦不盡相同。〈幸福論〉講述阿欣與阿明一對情侶於末日下出走的經歷，二人雖甜蜜熱戀，但亦有無法互相理解而頹靡徬徨的時侯。〈淵〉則講述主角H身處的城市逐漸崩毀，佢亦對生活於此感絕望痛苦，因而掙扎離開與否。