以「進退失據」形容香港人近幾個月嘅集體感覺非常貼切。「進退」、「失據」，顧名思義即係行前又唔係、退後又唔係，行事陷入困境繼而變得不安。就派生義而言，「進退失據」亦有準備不足，倉卒行事而張皇失措嘅意思。失據並非單純指「立足之地逐漸收窄」，同時亦反映心靈上嘅無所依歸。步入後極權年代，比起政權嘅直接打壓，我哋更常面對內心嘅掙扎、自我懷疑，眼見社會嘅種種不公義、作惡之人卻得以善終，我哋點樣能夠調和心中嘅不安？

縱觀世界就會明白我哋並不孤單，古今、世界各地都有人與我哋有同樣嘅經歷，有成功走出漆黑嘅隧道嘅、有失敗後至今仍在嘗試嘅。但我始終相信，就如東歐鐵幕倒下噉，看似係一連串偶然驅使，事實上卻係歷史嘅必然，當條件充分，一切自然地就會發生。就此，今期《學苑》希望繼續同大家剖釋現況，等大家借鑒歷史探討未來嘅路向，助各位讀者裝備自己，喺呢個動盪嘅時代可以少一啲「進退失據」、患得患失嘅感覺。

〈苑論：實然民族，何去何從——民族主義研究札記〉簡述民族主義嘅沿革，並沿著時代脈絡，透過民族主義框架梳理香港現況，推測未來可能嘅走向。

上冊《進退》涵蓋校園新聞及社會新聞。校園方面，後國安法時代，大學學術及言論自由被不斷蠶食，港大學生會舉辦《地厚天高》放映會被校方譴責警告、大學街連儂牆被拆卸後改建作「綠化」用途，動盪歲月裏作為大學生嘅我哋連守住校園僅有嘅自由都困難重重。社會新聞方面，「改土歸流」新聞專題，報道中共由多方面改造香港，猶如明末清初以流官取代土司，實行全面管治權，新聞專題敘述政權而國安法清算民主派初選、以宣誓褫奪抗爭、民主派區議員資格、整肅公務員以及紫荊黨橫空出世。學苑亦繼續跟進12港人案，除了被中國政府拘禁、身陷囹圄嘅12位手足，亦有多人被以「協助罪犯」一罪名拘捕；此外，政權亦繼續以「國安」之名打壓民主自由，多人被控違國安法受拘留。