自國安法生效、大搜捕開展、國家安全教育滲入學校，大部份家庭茶餘飯後嘅話題必定包括一句：「喂，你走唔走？」

今期《學苑》以「渡」為題，既係記錄香港人喺混沌時局中載浮載沉，同時希望探討到底有咩留下嘅原因。留下，又有咩價值可以守？

苑論將探討判斷力喺呢個時代下嘅重要性。而本刊嘅新聞部份分為「大學」以及「變革香港」。〈專訪前學生會會長葉芷琳：大學學生會的身分和責任〉、〈無光朔夜裏走過的路〉同〈科大停學風波：重思學生會定位和前路〉三篇文章分別訪問咗港大、中大同科大嘅前學生會成員，讓讀者了解現時大專學生會嘅處境，同時探討學生會嘅前路；而〈大專學界選舉投票率偏低〉整理咗近年學生會選舉嘅投票數據。「變革香港」內嘅〈2021立法會選舉改制〉同〈無力時代下，保留最後的信仰——記初選 47 人案〉則會梳理立法會選舉改革以及四十七人案嘅爭議。

移民者通常都會以「噉你仲可以做啲乜」嚟質疑留港嘅意義。喺專題方面，本刊嘅「見國」正呼應時代嘅浮沉，討論我哋今日仲可以做啲乜。〈迷失的一代〉記錄咗身處香港嘅年輕人會如何看待依片土地，以及我哋嘅迷惘。有見社會運動熱潮衰卻，〈留下的覺悟：寂靜時代到臨時〉重新思考「香港已死」依句說話。〈農業與我們的距離：平靜的抗爭〉則探討農業對於今日香港嘅意義。〈神必須從高台墜下〉一文嘗試反思人有冇神化領袖嘅傾向。

與此同時，部份移民者表示自己喺異國仍會教導子女廣東話，但噉樣足以傳承香港文化嗎？ 本刊「香港文化係乜？」嘅部份並唔係嘗試去定義文化、箝束佢流動嘅本質，而係想帶領大家用更廣嘅角度去看待香港文化嘅特性，思考佢嘅意義。〈文化好撚難〉一文會借簡單文化理論，嘗試回應廣受爭議嘅文化難題。而〈我好鍾意返工呀！〉則有見喺2019年嘅不合作運動中港人好想返工嘅現象後，希望探討依種文化嘅形成同演變。〈亂世有種文化：社會運動與生活〉一文點出社會運動激起港人對香港文化嘅重視，呈現出香港文化嘅可變性。喺樂壇方面，〈將死未死：香港獨立樂隊〉 討論香港獨立音樂如何屢屢喺逆境中自強，〈浩浩蕩蕩迎來另一新世紀：焫著香港娛樂產業〉則向讀者介紹香港男團嘅獨特性。〈戲劇是否只是創作者的自我高潮？——專訪一條褲製作藝術總監胡海輝〉 則探討劇場與社會嘅關聯。而〈舊路〉一文比較「光輝歲月」同今日嘅香港文化產業所面對嘅形勢，反思拎「舊日香港」去做量度文化成功與否嘅尺係咪合理。

「褻瀆」部份則展示出藝術中嘅「粗俗」。新詩 〈佢哋〉 嘗試呼應時代，〈《龍頭鳳尾》：顛鸞倒鳳嘅疼痛〉則探討香港文學中嘅暴與烈，而〈銀幕上的聲色慾〉一文討論電影中性愛情景嘅涵義。

「渡」字同時都指一個從此岸到彼岸嘅過程。而不論喺文化定政治方面，理想中嘅國度向來喺我哋嘅腦海中，就彷如燈塔。學苑始終相信留守我港有其意義，畢竟意義係人自己創造同賦予嘅。